Nasawi ang isang 39-anyos na lalaki habang sugatan ang kanyang 16-anyos na anak matapos silang pagbabarilin ng hindi pa nakikilalang mga salarin sa kahabaan ng LR Sebastian, Barangay Rosary Heights 10, Cotabato City, bandang alas-11:20 ng umaga nitong Sabado, Hulyo 11.
Kinilala ang nasawing biktima na si Surraff Kadir Pasandalan, 39-anyos, may asawa at residente ng Barangay Taviran, Datu Odin Sinsuat, Maguindanao del Norte. Ang kanyang anak na si Dustine Pasandalan, 16-anyos, ay nagtamo ng mga tama ng bala at kasalukuyang ginagamot sa pagamutan.
Batay sa inisyal na ulat ng pulisya, nakatanggap ng tawag ang mga awtoridad mula sa Cotabato City Tactical Operations Center (CTOC) alas-11:22 ng umaga kaugnay ng insidente. Agad namang rumesponde ang mga tauhan ng Police Station 2, kasama ang mga imbestigador sa pangunguna ni PMAJ Tugaya Z. Alfonso, Station Commander, at dumating sa lugar bandang alas-11:25 ng umaga.
Sa paunang imbestigasyon, lumalabas na magkaangkas sa isang kulay abong Honda Click na walang plaka ang mag-ama nang lapitan sila mula sa likuran ng mga suspek na sakay ng isang motorsiklo. Paulit-ulit umano silang pinaputukan gamit ang hinihinalang kalibre .45 na baril, batay sa mga basyong bala na narekober sa pinangyarihan ng krimen.
Agad na isinugod ng mga rumespondeng pulis ang dalawang biktima sa Cotabato Regional Medical Center (CRMC). Gayunman, idineklara nang dead on arrival si Surraff Pasandalan. Nagtamo siya ng mga tama ng bala sa ibabang bahagi ng likod, magkabilang tagiliran, itaas na bahagi ng likod, at kaliwang bahagi ng dibdib.
Samantala, patuloy na nilalapatan ng lunas ang anak nitong si Dustine matapos magtamo ng mga tama ng bala sa kanang binti at kaliwang bahagi ng likod.
Sa ngayon, hindi pa matukoy ng pulisya ang pagkakakilanlan ng mga salarin at ang motibo sa pamamaril ay patuloy pang iniimbestigahan.
Nagpatupad na rin ng lockdown protocol ang pulisya sa mga kalapit na Police Visibility Points (PVPs) at Border Control Points (BCPs) upang matunton at maaresto ang mga suspek.
Patuloy ang follow-up operation ng mga awtoridad, kabilang ang pagkuha ng mga kuha ng CCTV cameras sa lugar, pangangalap ng karagdagang impormasyon, at pagproseso ng crime scene ng Scene of the Crime Operatives (SOCO).
