Nagtipon ang mga kandidato, Commission on Elections (COMELEC), mga pwersang panseguridad, at iba pang sektor sa isinagawang Candidates’ Forum at Peace Covenant Signing sa Maguindanao del Norte bilang paghahanda sa kauna-unahang parliamentary elections sa Bangsamoro Autonomous Region in Muslim Mindanao (BARMM).
Pinangunahan ng Maguindanao del Norte Police Provincial Office (MDN PPO) ang aktibidad sa ilalim ng pamumuno ni Provincial Director PCol. George D. Bagundol Jr., katuwang ang COMELEC, Armed Forces of the Philippines (AFP), Philippine Coast Guard (PCG), Philippine Marine Corps, mga lokal na pamahalaan, sektor ng edukasyon, NAMFREL, media, at iba pang stakeholder.
Dumalo rin sa programa ang mga kandidato at kinatawan ng iba’t ibang distrito ng Maguindanao del Norte, kasama si Provincial Election Supervisor Atty. Mohammad Nabil M. Mutia at iba pang opisyal ng election at security sector.
Isa sa mga tampok ng programa ang Integrity Pledge kung saan nangako ang mga kandidato na itataguyod ang katapatan, pananagutan, paggalang sa batas, at integridad ng demokratikong proseso.
Lumagda rin ang mga kalahok sa Peace Covenant bilang simbolo ng kanilang pangakong itaguyod ang mapayapa, patas, at malinis na halalan at tutulan ang karahasan, pananakot, vote-buying, maling impormasyon, pandaraya, at iba pang paglabag sa batas sa halalan.
Naging bahagi rin ng programa ang pagpapakawala ng mga puting kalapati bilang sagisag ng kapayapaan, pag-asa, at pagkakaisa para sa matagumpay na pagdaraos ng halalan.
Nagtapos ang aktibidad sa isang boodle fight na dinaluhan ng mga kandidato, election officials, security forces, media, at iba pang stakeholder bilang pagpapakita ng pagkakaisa at pagtutulungan sa kabila ng pagkakaiba ng pananaw sa pulitika.
Ayon sa mga organizer, layunin ng naturang aktibidad na higit pang mapatatag ang pagtutulungan ng lahat ng sektor upang matiyak na ang kauna-unahang BARMM Parliamentary Elections ay magiging mapayapa, maayos, malinis, at kapani-paniwala.
