Isang 15-anyos na dalagita ang biktima ng pamamaril sa Purok 1, Brgy. Kaya-Kaya, Datu Abdullah Sangki, Maguindanao del Sur, bandang 1:30 ng madaling araw ngayong Pebrero 25, 2025.
Kinilala ang biktima na si Morhaipa Lindongan, isang estudyante at residente ng Demapantis, Rajah Buayan, Maguindanao del Sur. Samantala, hindi pa matukoy ang salarin at ang motibo sa krimen.
Ayon sa inisyal na imbestigasyon, nasa labas ng kanilang bahay ang biktima nang bigla na lamang siyang pagbabarilin ng hindi pa nakikilalang suspek. Tinamaan siya ng bala sa ulo at agad dinala ng kanyang mga kamag-anak pauwi sa kanilang bahay.
Kaagad namang rumesponde ang Datu Abdullah Sangki Municipal Police Station (DAS MPS) matapos makatanggap ng tawag mula sa isang concerned citizen. Isinagawa rin ang isang pursuit operation ngunit hindi naabutan ang salarin. Nakipag-ugnayan na rin ang pulisya sa mga opisyal ng barangay upang matulungan sa imbestigasyon.
Patuloy ang pagsisiyasat sa insidente upang matukoy ang may kagagawan at mabigyan ng hustisya ang biktima.
