Sugatan ang isang nurse matapos pagbabarilin ng mga hindi pa nakikilalang suspek sa Oblates Drive, Barangay Rosary Heights 7, Cotabato City kaninang umaga.
Ayon kay Cotabato City Police Station 2 Commander PMaj. Teofisto Ferrer Jr., ang biktima ay si Riza Linda Tulio, 36-anyos, residente ng nabanggit na lugar. Ang nasabing biktima ay isang nurse sa Cotabato Regional and Medical Center.
Ayon sa mga impormasyon, pauwi ang biktima mula sa kanyang night shift nang mangyari ang pamamaril. Nagtamo siya ng tama ng bala sa kanang kamay at agad isinugod sa ospital.
Narekober mula sa pinangyarihan ng krimen ang isang basyo ng bala mula sa Caliber .45 pistol.
Patuloy na nagsasagawa ng imbestigasyon ang mga awtoridad upang matukoy ang mga suspek at malaman ang motibo sa insidente.
