Arestado ang isang 16-anyos na dalagita sa ikinasang buy-bust operation ng PNP DEG-SOU15 at iba pang law enforcement units sa Poblacion 5, Cotabato City, pasado alas-6:30 ng gabi, Agosto 8, 2025.
Kinilala ang menor de edad na si alyas Mona residente ng Brgy. Poblacion 1, Cotabato City. Kasama niyang naaresto ang 38-anyos na babae na si alyas Bai, isa umanong newly identified high-value individual (HVI).
Nakumpiska sa operasyon ang tinatayang 500 gramo ng hinihinalang shabu na may street value na ₱3.4 milyon, boodle money, dalawang cellphone, pitaka, bag, at dalawang school ID.
Ayon sa pulisya, ang menor de edad ay isasailalim sa kustodiya ng City Social Welfare and Development (CSWD) habang nagpapatuloy ang imbestigasyon. Ang mga nakumpiskang ebidensya ay dadalhin sa RFU-BAR para sa laboratory examination.
Patuloy ang kampanya ng otoridad kontra ilegal na droga sa lungsod at rehiyon.
