Nanawagan ang Korte Suprema ng Pilipinas ng mabilis, masusi, at walang kinikilingang imbestigasyon upang mapanagot ang mga taong responsable sa pagpatay kay Presiding Judge Joseph M. Wee Sit ng Branch 2, Regional Trial Court (RTC), Isabela City, Basilan.

Ayon sa pahayag ng Korte Suprema na inilabas kahapon Nobyembre 16, 2026, binabantayan nito ang patuloy na imbestigasyon sa pamamaslang kay Judge Wee Sit, na binaril at napatay sa Zamboanga City noong Nobyembre 12, 2026.

Nagsampa na ng reklamo sa Office of the City Prosecutor ng Zamboanga City laban sa natukoy na gunman at dalawa pang hindi pa nakikilalang kasabwat. Kinumpirma rin ng mga awtoridad na may nakabinbing warrant of arrest laban sa natukoy na suspek na inilabas mismo ni Judge Wee Sit.

Bilang bahagi ng imbestigasyon, bumuo ang Philippine National Police (PNP) ng Special Investigation Task Group upang siyasatin ang insidente at paigtingin ang paghahanap at pag-aresto sa mga salarin.

Nakikipag-ugnayan din ang Korte Suprema, sa pamamagitan ng Office of the Judiciary Marshals (OJM), sa mga awtoridad upang matukoy ang lahat ng sangkot sa krimen, kabilang ang mga posibleng nagplano at nagpadali sa pagsasagawa nito.

Agad ding nagtungo sa Zamboanga City ang mga tauhan ng OJM matapos ang insidente upang mangalap ng impormasyon at makipag-ugnayan sa PNP hinggil sa imbestigasyon at seguridad.

Samantala, nangako ang Korte Suprema na tutulong sa pagtiyak ng seguridad ng pamilya ng yumaong hukom at sa pagpapalakas ng mga hakbang pangseguridad sa Branch 2 ng RTC sa Isabela City, Basilan. Inatasan din ang lahat ng Deputy Marshals na suriin ang kalagayang pangseguridad sa kani-kanilang nasasakupan at iulat ang anumang banta.

Noong Nobyembre 14, 2026, bumisita rin ang mga kinatawan ng Office of the Court Administrator sa burol ni Judge Wee Sit upang ipaabot ang pakikiramay at tiyakin sa pamilya nito ang patuloy na suporta ng hudikatura.

Binigyang-diin ng Korte Suprema na ang pagpatay kay Judge Wee Sit ay hindi lamang pag-atake sa isang miyembro ng hudikatura, kundi pag-atake rin sa kalayaan ng hudikatura at sa paghahari ng batas.

Tiniyak ng Korte na patuloy itong makikipagtulungan sa mga awtoridad, magpapahusay ng mga hakbang pangseguridad, at magbibigay ng impormasyon sa publiko tungkol sa mga susunod na kaganapan.

Iginiit din nito na hindi mapipigilan ng karahasan at pananakot ang hudikatura sa pagtupad sa mga tungkulin nito nang malaya, walang kinikilingan, at walang takot.