Nagpakitang-gilas ang Armed Forces of the Philippines katuwang ang United States Armed Forces, Japan Air Self-Defense Force, at Canadian Armed Forces sa isinagawang Counter-Landing Live Fire Exercise North (CLLFX-North) sa La Paz Sand Dunes sa Laoag, Ilocos Norte. Ang aktibidad ay bahagi ng mas malawak na Exercise Balikatan 41-2026.
Layunin ng pagsasanay na subukin ang kakayahan ng pinagsamang puwersa sa pagdepensa laban sa isang simulated na amphibious assault o paglusob mula sa dagat. Sa isinagawang senaryo, mabilis at sabay-sabay na kumilos ang mga tropa mula Pilipinas, Estados Unidos, Japan, at Canada upang hadlangan ang kalabang puwersa bago pa man ito makapagtatag ng posisyon sa baybayin.
Ipinakita ng AFP ang kanilang modernisadong kakayahan sa pamamagitan ng paggamit ng iba’t ibang kagamitang pandigma tulad ng Sabrah light tanks, ASCOD Command Post Vehicles, Armored Mortar Carrier na may 120mm system, at 105mm artillery. Nagbigay rin ng air support ang A-29 Super Tucano, AW109 helicopters, at Hermes unmanned aerial systems.
Samantala, pinalakas ng puwersa ng Estados Unidos ang operasyon gamit ang HIMARS rocket systems, AH-64 Apache attack helicopters, F-16 fighter jets, at P-8A Poseidon maritime patrol aircraft—na lalong nagpataas sa antas ng koordinasyon at lakas ng pinagsamang pwersa.
Nakilahok din ang Japan bilang bahagi ng lumalawak na ugnayan ng mga bansang nagtataguyod ng kapayapaan at seguridad sa Indo-Pacific region. Ang Canada naman ay tumulong sa Mass Casualty Exercise at nagsagawa ng defensive operations sa Culili Point, Ilocos Norte gamit ang heavy machine guns at iba pang armas.
Ayon kay Colonel Dennis Hernandez, tagapagsalita ng Balikatan 41-2026, ipinapakita ng ehersisyong ito ang lumalakas na kakayahan ng bansa na ipagtanggol ang teritoryo gamit ang pinagsamang lakas ng lupa, dagat, at himpapawid.
Binigyang-diin din niya na ang Balikatan ay patunay ng matibay na alyansa ng Pilipinas at Estados Unidos, pati na rin ng pakikipagtulungan sa iba pang partner nations, upang mapanatili ang kapayapaan at katatagan sa rehiyon.
Patuloy na pinagtitibay ng ganitong mga pagsasanay ang kahandaan ng sandatahang lakas at ang kolektibong paninindigan para sa soberanya at seguridad ng bansa.
