Natagpuan ang bangkay ng isang 16-anyos na binata sa isang concrete drainage sa Barangay Rosary Heights 10, Cotabato City, noong umaga ng March 8, 2026.
Ayon sa Cotabato City Police Office (CCPO) Station 2, natanggap nila ang ulat bandang 8:00 AM mula sa City Tactical Operations Center (CTOC) tungkol sa natagpuang katawan. Agad na rumesponde ang mga pulis, pinamumunuan ni PCPT Anuar M. Mambatao, upang beripikahin ang report.
Kinilala ang biktima bilang si Datu Ali Rodriguez Ganoy, isang estudyante at residente ng Purok Mapayag, Malagapas Street, Barangay Rosary Heights 10.
Batay sa paunang imbestigasyon, ang katawan ay unang napansin ng isang concerned citizen bandang 7:50 AM. Agad nitong ini-report sa mga awtoridad. Dumating sa lugar ang Scene of the Crime Operatives (SOCO) mula sa Regional Forensic Unit–BAR upang i-process ang crime scene. Sa unang pagsusuri, walang nakitang palatandaan ng laban o foul play. Ang tiyak na sanhi ng pagkamatay ay ilalabas lamang matapos ang post-mortem examination. Agad namang kinuha ng pamilya ang bangkay para sa tamang libing.
Dagdag pa ng imbestigasyon, nakasaad sa ulat at review ng CCTV footage na ang biktima ay kasama ang ilang kaibigan at inuulat na heavily intoxicated bago ang insidente. Habang pauwi, napansin sa CCTV na nawala siya sa view ng camera malapit sa isang naka-park na fire truck sa Malagapas, Barangay Rosary Heights 10.
Base sa karagdagang pagsusuri, natukoy na aksidenteng nahulog si Ganoy sa isang isa-metrong drainage, na naging dahilan ng kanyang pagkamatay.
