Nakataas ang flood warning sa sampung rehiyon sa bansa ngayong Lunes, June 22, bunsod ng tuloy-tuloy na pag-ulan na dala ng Bagyong Francisco, kasabay ng umiiral na Southwest Monsoon o Habagat at mga localized thunderstorms.
Ayon sa state weather bureau, posibleng makaranas ng malalakas na pag-ulan ang malaking bahagi ng bansa na maaaring magdulot ng biglaang pagbaha sa mga mabababang lugar.
Kabilang sa mga apektadong rehiyon ang MIMAROPA, Western Visayas, Central Visayas, Eastern Visayas, Zamboanga Peninsula, Northern Mindanao, Davao Region, SOCCSKSARGEN, CARAGA, at ang Bangsamoro Autonomous Region in Muslim Mindanao (BARMM).
Batay sa ulat, ang outer bands ng Bagyong Francisco ang pangunahing nakaaapekto sa silangang bahagi ng bansa, habang ang Habagat naman ang patuloy na nagpapabigat ng pag-ulan sa Visayas, Mindanao, at Palawan.
Nagpaalala ang mga awtoridad sa publiko na maging alerto sa posibleng pag-apaw ng mga ilog at mabilis na pagtaas ng tubig, lalo na sa mga lugar na malapit sa mga daluyan ng tubig at mabababang komunidad.
