Mariing tinuligsa ng Bangsamoro Federalist Party (BFP) ang mga umano’y pagtatangka na iugnay ang kanilang partido sa Israel, na ayon sa kanila ay “walang basehan” at nakabatay lamang sa kulay. Sa isang pahayag, sinabi ng BFP na ang ganitong paghahambing ay “mapanlinlang at lubhang nakasasakit,” lalo na sa kanilang mga miyembro at tagasuporta.
Binigyang-diin ng partido na para sa mga Muslim, mahalaga ang mga prinsipyo ng katarungan, katotohanan, at paggalang. Ayon sa kanila, ang pag-uugnay sa kapwa Muslim sa isang rehimen na iniuugnay sa pang-aapi ay salungat sa mga halagang ito. Binanggit din nila ang ilang personalidad sa partido na matagal nang naglilingkod sa adhikaing Bangsamoro at sumusuporta sa mamamayang Palestino.
Kasabay nito, nagpahayag ng pagkabahala ang BFP sa umano’y asal ng ilang tagasuporta ng United Bangsamoro Justice Party (UBJP), partikular sa mga insidente ng pangha-harass at personal na pag-atake sa social media. Ayon sa BFP, ang ganitong asal ay hindi nakatutulong sa pagkakaisa ng komunidad.
Ipinunto rin ng partido ang lumalaganap na “pattern ng disinformation” online na umano’y nagdudulot ng pagkakahati-hati sa publiko. Sa panahong kailangan umano ng Bangsamoro ang pagkakaisa at kahinahunan, sinabi ng BFP na ang ganitong uri ng pulitika ay nagpapahina sa kolektibong lakas ng mamamayan.
Sa huli, nanawagan ang BFP para sa mas mahinahon at nakabatay sa isyu na diskurso sa pulitika. Bagama’t iginagalang nila ang kalayaan sa pagpapahayag, iginiit nilang hindi dapat ito gamitin upang magpakalat ng maling impormasyon at bigyang-katwiran ang pang-aabuso.
