Isinagawa ng 33rd Infantry Battalion (33IB) sa ilalim ng 601st Infantry Brigade ang isang Support to Law Enforcement Operations laban sa natitirang miyembro ng Dawlah Islamiya-Haramayn Group (DI-HG) sa Sitio Kulalo, Barangay Manungkaling, Mamasapano, Maguindanao del Sur.
Ayon sa ulat, pinamunuan ni LTC Germen T. Legada, Commanding Officer ng 33IB, ang operasyon na naglalayong arestuhin at mapigilan ang mga armadong aktibidad ng grupo. Nakarekober ang tropa ng isang M14 rifle, isang kalibre .45 pistol, at isang hand grenade mula sa kanilang pinagtataguan. Patuloy ang clearing operations upang matiyak ang seguridad sa lugar.
Ang DI-HG, na pinamumunuan ni @Marhom, ay itinuturing na suspek sa iba’t ibang krimen sa Datu Hoffer, Shariff Aguak, at Mamasapano, kabilang ang pagpatay sa tatlong goat dealers, pagpugot sa isang lider ng Indigenous People, at pag-ambush sa tropa ng 40th Infantry Battalion noong Marso 2024.
Ayon kay BGen. Edgar L. Catu, Commander ng 601st Brigade, ang operasyon ay bahagi ng pagpapatupad ng batas sa lugar. Ani MGen. Jose Vladimir R. Cagara, Commander ng 6ID at Joint Task Force Central, ang koordinasyon ng militar, lokal na pamahalaan, at komunidad ay bahagi ng pagsisiguro ng seguridad sa Mamasapano.
