Wala pa ring plano ang Pilipinas na muling sumali sa International Criminal Court (ICC), ayon sa Malacañang, sa gitna ng paghahanda ng Philippine National Police (PNP) para sa mga posibleng protesta kaugnay ng unang anibersaryo ng pagkakaaresto ng dating pangulong Rodrigo Duterte.
Sinabi ni Presidential Communications Undersecretary Claire Castro na nananatiling pareho ang posisyon ni Pangulong Ferdinand Marcos Jr. at wala pa ring balak ang pamahalaan na muling maging miyembro ng ICC.
Naaresto si Duterte noong Marso 11, 2025 pagdating niya sa Maynila mula Hong Kong matapos ipatupad ng gobyerno ang arrest warrant ng International Criminal Court sa pamamagitan ng International Criminal Police Organization (Interpol). Iniimbestigahan siya ng ICC kaugnay ng mga alegasyon ng crimes against humanity na may kaugnayan sa kanyang kampanya laban sa ilegal na droga.
Noong 2018, iniutos ni Duterte ang pag-withdraw ng Pilipinas mula sa Rome Statute matapos maglunsad ng preliminary examination ang noo’y ICC prosecutor na si Fatou Bensouda. Pormal na naging epektibo ang pag-alis ng bansa sa ICC noong Marso 17, 2019.
Samantala, pinaigting ng PNP ang pagbabantay sa ilang lugar matapos ang mga panawagan sa social media para sa mga kilos-protesta at motorcade rally, kabilang ang planong pagdaan sa EDSA bilang paggunita sa isang taon mula nang maaresto si Duterte.
Sa panig ng ICC, pinagtibay ng Appeals Chamber ang naunang desisyon na manatili sa kustodiya si Duterte, at ibinasura ang apela ng kanyang abogado na si Nicholas Kaufman. Ayon sa International Criminal Court Pre-Trial Chamber I, sapat din ang kalusugan ng dating pangulo upang lumahok sa mga pre-trial proceedings.
Hinimok naman ni House lawmaker Leila de Lima ang administrasyon ni Marcos na pag-isipang muli ang pagbabalik ng Pilipinas sa ICC upang matiyak na mapapanagot ang mga lider na lalabag sa karapatang pantao kung sakaling mabigo ang lokal na sistema ng hustisya.
Samantala, naghain si Sen. Imee Marcos ng Senate Resolution No. 340 upang hilingin sa pamahalaan na ilabas ang lahat ng komunikasyon at direktiba ng gobyerno na may kaugnayan sa koordinasyon nito sa ICC, kasabay ng kanyang pahayag na maaaring nalabag ang karapatan ni Duterte sa naging proseso ng kanyang pagkakaaresto.
