Natagpuan ang bangkay ng isang lalaki sa Brgy. Papakan, Sultan sa Barongis, Maguindanao del Sur nitong Nobyembre 13, 2025 bandang 3:55 PM, ayon sa ulat ng lokal na istasyon. Isang concerned citizen ang tumawag upang i-report ang natagpuang walang buhay na katawan ng hindi pa nakikilalang indibidwal.
Dahil sa pagbaha sa lugar, na naging dahilan para hindi marating agad ang sitio, dinala ng mga residente ang bangkay sa Brgy. Bulod, Sultan sa Barongis, Maguindanao del Sur.
Agad na rumesponde ang mga tauhan ng istasyon, pinangunahan ni PLt. Samer J. Kasan, OIC, kasama ang SOCO team ng Provincial Forensic Unit (PFU) BAR sa pamumuno ni PCMS Usman A. Lumidas, OIC, upang beripikahin ang ulat.
Sa kanilang pagdating, nakumpirma ang impormasyon. Ang biktima ay isang lalaki, tinatayang 30–45 taong gulang, nakasuot ng grey na short pants at dilaw na T-shirt, nakalagay sa puting sako na nakatali ang paa. Lumabas sa paunang imbestigasyon na may tinamong pinsala sa ulo na dulot ng hindi pa natukoy na bagay.
Kasunod nito, isinagawa ng SOCO team ang forensic investigation bago dinala ang bangkay sa RC Funeral Homes, Brgy. Saliao, Esperanza, Sultan Kudarat, para sa ligtas na pag-iingat at tamang disposisyon.
