Inaresto ang tatlong lalaki at nasamsam ang droga at armas sa isang buy-bust operation laban kay alias Mohammad at kanyang mga kasabwat sa Barangay Tubig Indangan, Laa Island, Simunul, nitong Pebrero 8, 2026.
Ayon sa ulat, nakumpiska sa operasyon ang apat na heat-sealed sachets at dalawampu’t limang plastic straws na naglalaman ng tinatayang 15 gramo ng hinihinalang shabu na may halagang P183,600. Nasamsam din ang isang .45 caliber na baril, cellphone, identification card ni Mohammad, at iba pang kagamitan na ginagamit sa ilegal na droga.
Ang mga inaresto ay sina alias Mohammad (drug den maintainer), alias Erning, at alias Ammil, at pansamantalang ikinulong sa Bongao Municipal Police Station habang naghihintay ng inquest proceedings sa paglabag sa RA 9165.
Sa parehong operasyon, dalawang indibidwal ang nasagip at isasaayos na ngayon sa Municipal Social Services and Development (MSSD) at sa mga opisyal ng barangay para sa wastong pangangalaga at rehabilitasyon.
Ang insidente ay isa sa mga pinakabagong aksyon laban sa ilegal na droga sa rehiyon, na naglalayong tugunan ang lumalalang isyu ng drug dens sa Tawi-Tawi.
