Bago ang naganap na pamamaril sa isang paaralan sa Tacloban City, isa ring marahas na insidente ang naitala sa General Trias City, Cavite noong June 16, 2026, kung saan pitong mag-aaral ang nasugatan sa isang knife attack sa loob ng isang paaralan.
Ayon sa ulat, naganap ang insidente dakong alas-8:30 ng umaga sa isang pribadong paaralan sa Barangay Sta. Clara. Bigla umanong pumasok sa silid-aralan ng mga Grade 5 students ang isang Grade 8 student at inatake ang ilang mag-aaral gamit ang isang kitchen knife.
Dahil sa pangyayari, pitong estudyante ang nagtamo ng mga sugat at agad na isinugod sa ospital para sa agarang lunas. Kinumpirma naman ni General Trias City Mayor Luis “Jon-Jon” Ferrer IV na dalawa sa mga biktima ang kinakailangang operahan dahil sa tindi ng tinamong pinsala, ngunit nasa stable na ang kondisyon ng lahat ng sugatan.
Batay sa imbestigasyon, wala umanong guro sa loob ng silid-aralan nang mangyari ang insidente dahil nasa isang pulong ang mga ito. Sa kalaunan, isang guro ang nakasalubong ang suspek habang hawak pa nito ang patalim at agad na inutusan itong ibaba ang armas, na sinunod naman ng estudyante bago ito napigilan.
Patuloy ang imbestigasyon ng mga awtoridad upang matukoy ang motibo sa insidente, habang pinag-aaralan din ng paaralan at lokal na pamahalaan ang mga hakbang para mas mapalakas pa ang seguridad sa mga paaralan.
Ang insidenteng ito ay naganap ilang araw bago ang hiwalay na trahedya sa Tacloban City na nagdulot ng mas malawak na pagkabahala sa seguridad ng mga paaralan sa bansa.
