Pinaalis ng Philippine Coast Guard (PCG) ang isang hindi awtorisadong dayuhang fishing vessel mula sa territorial sea ng Pag-asa Island sa Kalayaan Island Group kahapon, Oktubre 25, 2026.
Ayon sa PCG, namataan ng kanilang mga tauhan sa umaga ng nasabing araw ang barkong pangisda sa layong 2.7 nautical miles sa kanluran ng isla, malapit sa Sandy Cay at nasa loob ng 12-nautical-mile territorial sea nito.
Agad itong sinita sa pamamagitan ng radyo at inutusang umalis sa lugar.
Pagsapit ng hapon, nagpadala ang PCG ng High-Speed Response Boat HSRB-019 na may dalang law enforcement team upang direktang sitahin ang barko. Sa pamamagitan ng loudspeaker, ipinaalam ng mga tauhan na hindi pinahihintulutan ang pangingisda sa territorial sea ng Pag-asa Island nang walang awtorisasyon.
Sinamahan ng PCG ang dayuhang barko hanggang sa makalabas ito sa nasabing karagatan. Bumalik naman sa isla ang HSRB-019 nang walang naitalang insidente.
Sa isinagawang operasyon, sinundan ng China Coast Guard Vessel 21581 at dalawa nitong rigid-hull inflatable boat ang HSRB-019 at mahigpit na minonitor ang kilos ng mga tauhan ng PCG. Gayunman, ayon sa PCG, naisagawa nila ang operasyon nang walang panghihimasok.
Ito na ang ikapitong operasyon ng PCG sa loob ng wala pang apat na linggo upang paalisin ang mga dayuhang barko sa Kalayaan Island Group.
Ang Pag-asa Island ang sentro ng pamahalaan ng Bayan ng Kalayaan sa Palawan at tahanan ng isang komunidad ng mga Pilipinong sibilyan.
Ayon sa PCG, palalakasin pa nila ang kanilang kakayahang tumugon sa mga dayuhang barkong pumapasok sa lugar sa pamamagitan ng paglalagay ng karagdagang High-Speed Response Boats sa Kalayaan Island Group.
