Mataas ang posibilidad na maging bagyo ang low pressure area (LPA) na nasa labas ng PAR sa susunod na 24 oras. Huli itong namataan sa layong 1,270 km silangan ng Northeastern Mindanao. Kung tuluyang mag-develop, tatawagin itong Bagyong Basyang, at magiging ikalawang bagyo ng Pilipinas ngayong taon. Sa kasalukuyan, wala pa itong epekto sa ating bansa.
Samantala, patuloy ang epekto ng Shear Line sa eastern Visayas at Mindanao, habang ang Northeast Monsoon o Amihan ay nakakaapekto sa Luzon.
Sa Visayas, Caraga, Davao Region, at Misamis Oriental, maulap na kalangitan na may kalat-kalat na pag-ulan at ilang pagkidlat-pagkulog ang nararanasan, kaya posibleng magdulot ng flash flood o landslide kung magpapatuloy ang malakas na ulan.
Sa Batanes at Babuyan Islands, maulap na may mahinang pag-ulan ang panahon, ngunit walang malakas na epekto.
Sa iba pang bahagi ng Mindanao, bahagyang hanggang maulap ang kalangitan na may pulu-pulong pag-ulan o pagkidlat-pagkulog sanhi ng localized thunderstorms, na posibleng magdulot ng pagbaha o pagguho ng lupa sa panahon ng malakas na bagyo.
Samantala, ang Metro Manila at ibang bahagi ng Luzon ay bahagyang hanggang maulap na kalangitan na may pulu-pulong mahihinang pag-ulan bunsod ng Northeast Monsoon, at walang malakas na epekto sa ngayon.
