Nabaril ang isang branch manager ng CARD Inc. na nauwi sa kanyang pagkasawi matapos agawan ng motorsiklo sa Libungan, Cotabato kagabi.
Batay sa inisyal na ulat, naganap ang insidente bandang alas-10 ng gabi sa Barangay Batiocan. Kinilala ang biktima na si Daryl Villarta, nasa tamang edad at residente ng Pikit, Cotabato. Siya ay nagsisilbing branch manager ng CARD Inc. 1 sa bayan ng Pigcawayan.
Ayon sa impormasyong nakalap mula sa mga kaanak at kasamahan ni Villarta, pauwi na sana ang biktima nang harangin ito ng mga hindi pa nakikilalang salarin. Sapilitan umanong inagaw ang motorsiklo nito bago siya barilin.
Patuloy ang isinasagawang imbestigasyon ng mga awtoridad upang matukoy ang pagkakakilanlan ng mga suspek at ang motibo sa krimen.
