Patuloy na pinapalakas ng Philippine National Police (PNP) ang ugnayan nito sa mga tradisyunal na pinuno sa Maguindanao del Sur bilang bahagi ng pagpapanatili ng kapayapaan at kaayusan sa rehiyon.
Sa isang pagpupulong sa Barangay Tambunan II, Guindulungan, Maguindanao del Sur, nakipagdayalogo si Acting Provincial Director PCOL Michael John C. Mangahis kay Traditional Leader Datu Midpantao M. Midtimbang Sr., kasama si Vice Mayor Midpantao M. Midtimbang Jr.
Tinalakay sa naturang pagtitipon ang usapin ng peace and order, kaligtasan ng publiko, at ang mahalagang papel ng mga lider sa paggabay sa komunidad sa gitna ng mga hamon.
Binigyang-diin sa pagpupulong ang kahalagahan ng pamumuno na nakaugat sa prinsipyo ng katarungan, pagkakapantay-pantay, at malasakit sa kapwa—mga halagang nagsisilbing gabay sa maayos na pamamahala at matatag na komunidad.
Ayon sa mga opisyal, mahalaga ang balanseng pamumuno kung saan nagsasanib ang tradisyunal na kaalaman at espiritwal na paggabay ng mga pinuno, at ang makabagong sistema ng pamahalaan na nagpapatupad ng batas at kaayusan.
Binanggit din na ang katarungan ang nagsisilbing pundasyon ng pangmatagalang kapayapaan, kung saan mahalaga ang patas na pagpapatupad ng batas at pantay na pagtrato sa lahat ng mamamayan.
Sa bahagi naman ni Datu Midtimbang Sr., binigyang-diin niya ang kahalagahan ng pasensya, diyalogo, at pagkakasundo bilang mabisang paraan sa pagresolba ng hindi pagkakaunawaan sa komunidad.
Ayon sa PNP, ang naturang inisyatiba ay patunay ng kanilang patuloy na pakikipagtulungan sa mga tradisyunal na lider at lokal na pamahalaan upang mapalakas ang kapayapaan, pagkakaisa, at kaunlaran sa lalawigan.
