Nailigtas at muling pinalaya sa natural na tirahan ang isang Philippine tarsier (Carlito syrichta) matapos itong ma-recover sa Kiamba, Sarangani Province noong Abril 11, sa pamamagitan ng Community Environment and Natural Resources Office (CENRO) Kiamba.
Ang nasabing tarsier, na may sukat na humigit-kumulang 3.5 inches lamang, ay unang natagpuan ng mga miyembro ng Indigenous Peoples (IP) community sa kabundukan ng Barangay Suli. Ayon sa ulat, inakala umano ng mga nakakita na ito ay isang “maliit na unggoy” kaya’t ibinaba ito mula sa upland forest area.
Agad namang isinailalim sa health assessment ang naturang primate bago tuluyang ibinalik sa kagubatan bilang bahagi ng wildlife conservation efforts.
Ayon sa CENRO, ang insidente ay hindi lamang simpleng rescue operation kundi maaari ring magsilbing mahalagang indikasyon ng posibleng presensya ng mga tarsier sa Kiamba na hindi pa ganap na naidodokumento ang eksaktong habitat.
Ang Philippine tarsier ay isang nocturnal primate na matatagpuan lamang sa Pilipinas at kilala sa napakaliit na katawan at malalaking mata. Ayon sa mga eksperto, ito ay lubhang sensitibo sa human interaction at bihirang mabuhay kung mailalayo sa natural na kapaligiran nito.
Sinabi pa ng mga awtoridad na ang matagumpay na pagpapalaya sa naturang hayop ay isang positibong hakbang sa pagpapalakas ng conservation efforts sa rehiyon, lalo na sa gitna ng patuloy na banta ng habitat loss at human disturbance sa mga wildlife species.
