Ipinagkaloob ng Western Mindanao Command (WestMinCom) ang mataas na pagkilala sa tapang at sakripisyo ng dalawang sundalong namatay sa tungkulin sa Datu Hoffer, Maguindanao del Sur noong Enero 27, 2026.
Ang mga pinarangalan ay sina Sergeant Junie C. Mangalay Jr. at Sergeant Ryan Jun P. Bagual, parehong miyembro ng 90th Infantry Battalion ng 6th Infantry (Kampilan) Division. Pareho silang nag-alay ng kanilang buhay habang matapang na nakipag-engkwentro sa mga armadong terorista upang protektahan ang mamamayang Pilipino.
Pinangunahan ni Lieutenant General Donald M. Gumiran, Commander ng WestMinCom, kasama si Major General Jose Vladimir R. Cagara, Commander ng 6th Infantry Division at Joint Task Force Central, ang pagbibigay ng Posthumous Award at Military Merit Medal kay Sgt. Mangalay Jr., na tinanggap ng kanyang pamilya sa isang solemn ceremony sa Camp Siongco Mortuary noong Enero 30, 2026.
Si Sgt. Bagual naman ay pinarangalan sa hiwalay na seremonya sa kanyang tahanan sa President Quirino, Sultan Kudarat, kung saan ang award ay tinanggap ng kanyang pamilya. Siya ay inilibing alinsunod sa Islamic rites, bilang karampatang pag-alala sa isang sundalo na naglingkod nang may dangal hanggang huling hininga.
Kasama rin sa programa ang agarang pagbibigay ng pinansyal na tulong sa pamilya ng mga nasawing sundalo, bilang bahagi ng suporta ng Armed Forces of the Philippines sa mga naulila sa serbisyo.
