Isinuko sa Philippine National Police (PNP) sa Davao City ang humigit-kumulang 20 baril na nakarehistro kay Senator Ronald “Bato” Dela Rosa matapos bawiin ang kanyang lisensya at pahintulot sa pagmamay-ari ng mga armas.
Ayon sa PNP, ang mga naturang baril ay kasalukuyang nasa kustodiya ng Regional Civil Security Unit 11 para sa tamang safekeeping at dokumentadong disposisyon, alinsunod sa umiiral na proseso ng ahensya.
Ipinaliwanag ng PNP na ang pagbawi ng License to Own and Possess Firearms (LTOPF) ay alinsunod sa Republic Act No. 10591 o Comprehensive Firearms and Ammunition Regulation Act, na naglilimita sa karapatang magmay-ari ng baril ng mga indibidwal na may partikular na legal na hadlang batay sa umiiral na mga patakaran.
Batay sa tala ng Firearms and Explosives Office (FEO), si Dela Rosa ay dati umanong may Type 5 LTOPF na nagpapahintulot ng mas mataas na bilang ng pagmamay-ari ng baril. Sa kabuuan, nasa 117 baril ang nakarehistro sa kanyang pangalan at ipinag-utos ding isuko bilang bahagi ng proseso.
Ang revocation order ay inilabas noong Mayo 26, 2026, kasunod ng direktiba ng Department of Justice na ipatupad ang mga kaukulang hakbang kaugnay ng International Criminal Court (ICC) warrant na may kinalaman sa mga kasong crimes against humanity na kaugnay ng war on drugs noong nakalipas na administrasyon.
Tiniyak ng PNP na mananatili sa kanilang pangangalaga ang lahat ng isinukong armas habang isinasagawa ang nararapat na legal na proseso.
Patuloy namang mino-monitor ng mga awtoridad ang sitwasyon upang matiyak ang pagsunod sa batas at mapanatili ang kaayusan.
