Bumisita si Police Brigadier General Christopher M. Abecia, Regional Director ng Police Regional Office–Bangsamoro Autonomous Region (PRO-BAR), sa mga yunit ng pulisya sa Bongao, Tawi-Tawi noong Hulyo 3 bilang bahagi ng pagpapatibay sa disiplina, kahandaan, at pananagutan ng mga kapulisan sa lalawigan.
Sa isinagawang command visit sa Camp Alejandro Suarez, masusing ininspeksyon ni Abecia ang mga nakumpiska at boluntaryong isinukong armas na nasa pangangalaga ng Tawi-Tawi Provincial Mobile Force Company sa ilalim ng Comprehensive Control and Secure Documentation of All Firearms (CCSDAF) system.
Layunin ng inspeksyon na matiyak na maayos ang dokumentasyon, imbentaryo, at seguridad ng mga armas at iba pang pag-aari ng pamahalaan alinsunod sa umiiral na mga alituntunin ng Philippine National Police.
Kasabay nito, nagsagawa rin si Abecia ng isang “Talk to Men” session kasama ang mga tauhan ng provincial at municipal police, gayundin ng Special Action Force (SAF), kung saan kanyang binigyang-diin ang kahalagahan ng integridad, propesyonalismo, at tapat na paglilingkod sa publiko.
Sa kanyang mensahe, hinikayat ng PRO-BAR Regional Director ang bawat pulis na patuloy na pairalin ang mabuting asal at pananagutan sa kanilang tungkulin, habang iniiwan ang kanyang paalala: “Sa tuwina, piliin nating maging mabuting tao.”
