Nagmistulang welcome party sa loob ng kulungan ang sumalubong sa isang lalaki matapos itong muling mahuli dahil sa pagkakasangkot sa ilegal na droga. Naaresto ang suspek sa isinagawang operasyon ng mga kawani ng Barangay Poblacion Dos, Presinto Uno, at ng mga kasapi ng Philippine Marines sa lungsod ng Cotabato, dakong alas-10 ng gabi nitong Linggo.
Kinilala ang suspek na si Abdulaziz Macmod, residente ng Purok Lapu-Lapu, Rosary Heights 3. Ayon sa mga otoridad, nakuha mula sa kanyang pag-iingat ang isang transparent sealed sachet ng hinihinalang shabu.
Napag-alaman na may dati nang rekord ang suspek kaugnay sa paggamit at pagtutulak ng ipinagbabawal na gamot, batay sa tala ng himpilan ng pulisya.
Kasalukuyan na siyang nasa kustodiya ng Presinto Uno at nakatakdang sampahan ng kaso sa ilalim ng Republic Act 9165 o ang Comprehensive Dangerous Drugs Act of 2002.
