Matinding dagok sa ekonomiya ng Iran ang patuloy na tensyon at digmaan laban sa Estados Unidos at Israel, kung saan daan-daang libong manggagawa ang nawalan ng hanapbuhay mula nang sumiklab ang kaguluhan noong Pebrero 28, 2026.
Dahil sa krisis, napilitan ang maraming kumpanya at industriya na ihinto o bawasan ang kanilang operasyon. Kabilang sa pinakaapektado ang mga pabrika, maliliit na pagawaan, at iba’t ibang service sector, na nagresulta sa malawakang tanggalan ng mga contractual at arawang manggagawa.
Malaki rin ang naging tama sa sektor ng enerhiya, partikular sa mga petrochemical plant at steel facilities, na napinsala o tuluyang huminto ang produksyon bunsod ng mga airstrike. Tinatayang sampu-sampung libong empleyado sa industriyang ito ang direktang naapektuhan.
Bukod dito, lalong lumala ang sitwasyon nang ipatupad ang internet restrictions sa bansa. Dahil dito, nawalan ng kabuhayan ang libu-libong freelancer, programmer, at content creators na umaasa sa online work.
Sa kabuuan, inaasahang lalagpas sa 10 porsyento ang pagbagsak ng ekonomiya ng Iran, habang ang kabuuang pinsala ay tinatayang aabot sa daan-daang bilyong dolyar.
Dagdag pa sa suliranin, ang pagkaantala sa suplay ng langis at pagsasara ng mahahalagang ruta ng kalakalan ay nagdulot ng pagtaas ng presyo ng mga pangunahing bilihin, na lalo pang nagpapabigat sa kalagayan ng mga ordinaryong mamamayan.
Sa gitna ng patuloy na kaguluhan, nananatiling hamon para sa Iran ang pagbangon ng ekonomiya at pagbibigay ng sapat na kabuhayan sa kanilang mamamayan.
