Isang sugatang Philippine Eagle na may malalang sugat na ininfest ng mga uod o maggots ang nailigtas matapos itong isuko sa Department of Environment and Natural Resources (DENR) noong July 3, 2026.
Bago ito maisuko sa mga awtoridad, isang binata na kinilalang si Marven Linoy ng Bukidnon ang tumulong sa pagsagip sa sugatang agila at naghatid dito sa mga responder upang agad na mabigyan ng kinakailangang lunas.
Natagpuan ang adult female eagle malapit sa Sawaga River sa Barangay Dalwangan, Malaybalay City, Bukidnon. Ayon sa mga beterinaryo, nang masuri ang agila ay napag-alamang ito ay lubhang nanghihina, dehydrated, hindi na makalipad, at marumi at sira na ang mga balahibo sa katawan at mga pakpak—mga palatandaang matagal na itong hindi nakalilipad at nanatili sa lupa.
Sa paglilinis ng mga sugat nito, natuklasan ng mga beterinaryo ang matinding infestation ng mga maggots sa magkabilang pakpak, buntot, at iba pang bahagi ng katawan. Dahil dito, agad itong nilapatan ng lunas sa pamamagitan ng paglilinis at pagdidisimpekta ng mga sugat, pagtanggal ng mga uod, pagbibigay ng gamot laban sa pananakit, at fluids para sa dehydration.
Sa tulong ng DENR, City Environment and Natural Resources Office (CENRO) ng Malaybalay, Provincial Zoo, Philippine Eagle Foundation, mga katutubong komunidad, at mga volunteer, ligtas na nailipat ang agila sa pangangalaga ng Philippine Eagle Foundation bago dinala sa Davao City para sa mas masusing gamutan.
Isinailalim ang agila sa iba’t ibang pagsusuri kabilang ang X-ray, blood tests, parasite screening, at iba pang diagnostic examinations upang matukoy ang lawak ng pinsala at gabayan ang mga beterinaryo sa paggamot nito.
Pinangalanan ang agila na “Sawaga-Dalwangan”, hango sa lugar kung saan ito natagpuan.
Sa kasalukuyan, patuloy pa ring inaalis ng mga beterinaryo ang natitirang mga maggots sa katawan ng agila habang nagpapatuloy ang gamutan nito. Patuloy ding iniimbestigahan ng DENR, katuwang ang iba pang ahensya, ang sanhi ng mga tinamong sugat at kung may nalabag na batas sa pangangalaga ng wildlife.
Ayon sa Philippine Eagle Foundation, tinatayang wala pang 400 breeding pairs ng Philippine Eagle ang natitira sa kagubatan ng Pilipinas, dahilan upang maging mahalaga ang bawat matagumpay na rescue para sa patuloy na konserbasyon ng pambansang ibon.
